Saturday, November 18, 2006

咬文嚼字(三)

歡迎收睇第三集「咬文嚼字」。上集問答遊戲嘅答中率非常好,係100%,亦都係同一位家庭觀眾答啱,不禁令人懷疑可能呢個節目根本係得一位觀眾,製作單位開始擔心收視率,不過都好多謝嗰位觀眾、以及廣告商對我地嘅支持。

我地喺第一集討論過"大鑊"一詞,有人報料話係大鑊粥,"杰噠噠"咁解喎。不過主持人認為要睇嗰鑊係咩粥至得,假如係潮州粥(本人尤其喜愛方魚肉碎粥),咁就稀dum dum架喇。言歸正傳,今日想講吓同霎哈嘉武林有啲"啦lung"嘅俗語。

(一) 食過夜粥
話人食過夜粥,即係話佢有功夫底子咁解。話說當年啲武館通常喺晚飯後先至開始練功嘅,而師母(又或者嗰啲冇份連功嘅人)就會趁得閒煲落粥,等啲練功者練完功做宵夜嘅。「食夜粥」一詞就此衍生出來。所以在下都keep住食緊夜粥架,你今日又食咗未呀?

廣告時間:
乜咁煩呀,白頭髮﹖你又係呀﹖搽咗啲咩呀﹖黃禁禁咁嘅﹖
學我啦!梳啲美源髮彩,逐漸變黑又得,立即變黑哂亦得。得咗!
美源髮彩,冇得彈!



菊花,菊花,顏色就靚喇
菊花牌乳膠漆,顏色仲靚呀
日曬雨淋,水洗都不變
樓房內外都適用
請用,請用,菊花牌乳膠漆 啦啦啦


(二) 口頭禪
「口頭禪」意思係慣用嘅說話。本來「口頭禪」係佛家語,而「禪」乃譯自梵文「dhyana」。所謂「口頭禪」,係有口頭上經常唸頌之意,如mantra。在下近期嘅口頭禪,都離不開Shri Chandrama同Shri Himalayas,懷疑同夜粥食得太夜,再加上文字咀嚼得太多有關。你今期又有啲咩口頭禪呢?

好嘞,又係問答遊戲時間。今集嘅問題就係:有一日,大俠"任我痕"周身痕之際不慎中伏(懷疑是"西方失敗"所設下之陷阱),被吊起在一棵樹上,繩子下是一枝蠟燭,剛巧樹下有隻老虎經過,假如蠟燭燒斷了繩子,他便會掉下給老虎吃掉,請問任大俠該怎樣解圍呢?(正所謂江湖險惡,各位闖蕩江湖之英雄豪傑學定一招半式傍身,有起事都唔駛話咁騰雞嘛。諗定差唔多架喇! )

5 comments:

Anonymous said...

吹熄之蠟燭味得囉!

Anonymous said...

唉吔,慢了一步,大俠「任我痕」向老虎唱生日歌~老虎便把蠟燭吹熄了。

eb大俠 said...

嘩,本大俠正在回覆二小姐之同時,竟然又俾DingDing少俠搶先一步答咗個問題。

冇錯,任大俠的確未煉成「長氣大喇叭」,因此無法從半空中運氣將地上之蠟燭吹熄(佢心裡面都好後悔當初冇俾心機煉功)。不過好彩,任大俠醒起自己曉「牙癢功」架噃,於是佢張開咀,加上深情嘅眼光對老虎唱:

Happy birthday to you
Happy birthday to you
Happy birthday dear 老虎
Happy birthday to you~

老虎都唔醒起原來自己生日,仲有人同佢慶祝添,開心都來唔切,許咗個願之後就將支蠟燭吹熄咗嘞。傳說任大俠從此就被吊喺樹上,直到永遠,阿門。

Anonymous said...

版本二(記載於武林秘史)
任大俠醒起武林相傳已久的霎哈嘉心法,心裡默唸一聲 Jay Shri Mataji,但蠟燭卻絲毫沒有熄滅,火光還越燒越厲害,眼看繩子快要燒斷,任大俠心裡暗驚︰「難道天亡我也?」說時遲那時快,任大俠已從樹上掉下來,卻絲毫沒有損傷,原來剛巧掉在虎背上,蠟燭沒有越燒越短,任大俠手中拿著蠟燭,騎在虎背上,向天上長嘯一聲Jay Shri Mataji,揚長而去,只聽到樹林中隱隱傳來Jay Shri Mataji的回音……

下次,如果你在江湖行走,偶然見到一個手中拿著蠟燭,騎在虎背上的怪人,請不要驚訝,他要以一枝蠟燭熄亮另一枝蠟燭,向有緣人訴說他的故事……

Anonymous said...

哎呀,大鑊,不是熄亮,是燃亮呀