Monday, November 13, 2006

咬文嚼字

廣東話我哋就由細講到大,不過當中有好多俗語/口頭禪,你有冇諗過係點衍生出嚟嘅呢?喺「咬文嚼字」呢個充滿懷舊氣息嘅節目入面,我會嘗試同大家探討一吓一啲常用俗語嘅來源。

(一) 唔理三七廿一
我諗「三七廿一」,應該係我哋唯一一個喺識唸乘數表前已經常接觸到嘅乘數。記得當我二年級唸「九因歌」唸到「三七二十一」時,心情特別興奮,可能係因為發現除咗「一一如一」之外,原來仲有一個好易記嘅乘數。而當全班同學上數學堂一齊唸乘數表唸到「三七二十一」嗰時都會特別大聲,之後大家仲會得意洋洋地偷笑,唔知點解,啲小朋友硬係覺得「三七廿一」出自「九因歌」呢個事實係好妙、好搞笑。我曾經問過長輩,點解要唔理三七廿一?而唔係三八廿四?又或者六五中三十呢?此時,我嘅腦海又浮現出另一個問題。究竟六五三十點解要加個"中"字呢?呢個中字又有冇意思嘅呢?我都未曾有機會將我嘅思緒轉化成言語,就聽見長輩話:「你唔好理三七廿一,快啲唸熟個乘數表先講啦!」
後來我嚟到霎哈嘉,接觸到三脈七輪的知識後,又開始諗,唔通以前啲人咁醒,早就明心見性,悟出「三七廿一」的箇中奧秘?咁講法,假如我哋真係唔理三七廿一去做一件事,即係話連三脈七輪都撇開,真係將"豁出去"呢個意思表達得淋漓盡致囉。

廣告時間:
Drink...Drink drink...常飲竹蔗茅根精
媽咪沖定晒,你返學記得帶
Drink...Drink drink...常飲竹蔗茅根精

由朝坐到晚,運動少,周身骨痛精神壞
冇佢嚟補養,快蒼老,易捱壞
我地咁辛苦,擒高擒低靠腰力、靠腳力
調補身體最緊要,病君咁樣點搵食

鋤得多,傷氣力,消耗一定要補充,唔駛失威悲到極
你哋諗吓啦,而──咦! 咪講笑,快啲食!

(二) 大鑊
所謂大鑊,唔駛講大家都知道係大件事咁解啦。但係兩者之間有咩關係呢?有人話過我知,係大鑊飯咁解。之但係大鑊飯有咩咁大件事呢?佢好理所當然地回答:「大鑊飯喎,你諗吓,幾大隻鑊呀。」我好認真地諗咗吓,搖頭嘆息:「好深,諗唔明。」或者呢個係出自烹飪界嘅"術語",要煮大鑊飯係好麻煩嘅一件事啩?!
不過,"鑊"令我聯想起以前啲人迷信,嗰啲"唔啱啞"嘅鄰居會掛隻鑊喺屋企出面,話要邪住對方至配合風水喎。當對面屋阿陳師奶買完餸返到嚟見到,梗係大聲疾呼:「唉吔,啋! 大吉利是咩! 咁大鑊!」 之後經過隔離阿王師奶同張師奶四出八卦後,"大鑊"一詞喺九秒九內流傳到街知巷聞。

好嘞,今集講住咁多先,下集我會再同大家研究一啲其他嘅廣東話俗語。不過臨收工前同各位家庭觀眾玩個冇獎問答遊戲先。問題係:有一日,一隻識聽少少人話嘅馬騮贏咗個比賽,有三樣禮物俾佢選擇:(一) 現金五千元; (二) 相機; (三) 來回亞洲機票乙張。經過主人說明禮物嘅用途後,馬騮選擇咗相機,你話點解呢?(歡迎各界人士留言搶答。答案將於下回揭曉。)

3 comments:

DingDing said...

變「蕉」相機
(變焦相機)

eb大俠 said...

呢位同學真係聰明伶俐嘞,答得快而準。冇錯,主人同馬騮講,部相機係會自動變「蕉」嘅,馬騮聽見梗係開心啦。
多謝dingding同學嘅參與,希望下次節目時間再同大家見面啦,拜拜~~

愛得瘟 said...

怪不得eb大俠常說 : 「接 『招』 啦, 師兄!"

哦‧原來她自己喜歡吃蕉, 就叫埋各路英雄一齊來好料共享。真的民胞物與,善心一片。

善哉 ! 善哉 !