Friday, November 24, 2006

咬文嚼字(四)

歡迎收睇「咬文嚼字」第四集。在過去一星期之中,我們的收視率上升了兩倍,觀眾人數已達三人之多。製作單位對此成績深感滿意,部份香港政府部門亦對本節目表示支持,買下了我們今集的廣告時段。

(一)串
記得細個嗰陣,因為朝早起身未瞓醒,唧都唔識笑,經常俾人話個樣好串。大家都知道"串"係招積、得戚、沙塵、囂張、高傲咁上下意思啦,之但係點解個串字會有咁嘅意思呢?根據《俗語趣談》主持劉Sir解說,這應與文化大革命時,串連之串有關。所謂串連(亦稱作大串聯),是文革中不同單位、地區的群眾互相串聯,以了解動態,交流經驗的活動。在 1966 年毛澤東在北京接見各地的紅衛兵到北京參觀、學習,規定來京參觀者一律免費乘坐火車,生活補助費和交通費由國家財政開支,使大串聯規模迅速擴大。衝擊黨政軍領導關、 揪鬥領導幹部,大串連使地方各級黨政機構逐漸陷入癱瘓狀態,整個運動失控,全國一片混亂(有興趣可到中國網http://big5.china.com.cn/chinese/zhuanti/208162.htm看有關資料)。所以有得去串聯,批鬥人之餘仲包車腳食宿,真串也!

廣告時間:
兩個就夠晒數,兩個就夠晒數,生女也好,生仔也好,兩個已經夠晒數
無謂追(無謂追),無謂追(無謂追) ,追得到也未必好,追唔到呢生壞肚
兩個就夠晒數,兩個已經夠晒數!

一身兒女債,計都計唔晒,兩個湊到大,生活更愉快
生晒唔洗煩,一世安樂晒,永久避孕唔再生,一次搞掂晒
一次搞掂晒!


(二) 招積 / 得戚 / 沙塵
正如前文提到,串係招積、得戚、沙塵咁解。咁招積一詞又係點嚟架呢?有人認為"招積"是出自「滿招損,謙受益」;而積,為積少成多便「滿」,即「自滿」(參考資料:俗語趣談—齊齊講)。 亦有人話"招積"應該寫成「招跡」 ,我猜想應該是「行跡招搖」的意思。在下亦跟任大俠討論過此事,喜歡吔蕉的他說招積好明顯應該寫成「蕉積」方為make sense。他說:「一個人積積埋埋咁多蕉喎,你話佢仲唔蕉積?!」在下聽後不禁"O 嘴"。

咁何謂得戚呢?據劉Sir解釋「得敕」之「敕」乃舊時王帝的旨,得之便意氣風發。而至於沙塵,通常膽拖白霍,但兩者意思不同。沙塵,相信是指一個人行為招搖,所到之處必掀起一番塵土,謂之沙塵也。

好嘞,今集講住咁多先,節目臨完結前當然唔少得我地嘅問答遊戲啦。為配合我地贊助商「家計會」嘅主題,今集問題係:蘇蝦半夜肚餓喊醒咗,勊到阿媽都唔認得嘅媽媽有咩辦法只用一隻腳來沖奶呢?所有打算做媽媽之群雌學定呢招傍身將來絕對用得著,但記住:兩個就夠晒數喇! 拜拜~

2 comments:

DingDing said...

阿媽教落︰用腳踢醒身旁的老公,叫他去做!

但煲呔曾鼓勵香港人生三個喎!騎騎……

eb大俠 said...

冇錯,D咁粗重嘅嘢梗係點相公去做啦,生仔咁辛苦,實行點到佢慌,問佢怕未!

P.S. 乜家陣興生三個架咩?在下真係out嘞!冇計,D贊助商仲停留喺70年代,的確係leung咗D!多謝DingDing少俠提點。