咬文嚼字(二)

歡迎收睇我地第二集嘅「咬文嚼字」。上集問答遊戲，有一位朋友答中，不過冇獎。答案已張貼於留言板。

上集討論"大鑊"之出處時提到"八卦"一詞，今日想同大家講解一吓八卦呢個俗語係點嚟嘅。

八卦源自中國古代嘅陰陽學說，所謂「無極生有極，有極是太極，太極生兩儀，兩儀生四象，四象演八卦，八八六十四卦」，此為伏羲八卦，也叫先天八卦(就同好多師奶一樣)。有先天當然有後天八卦啦，不過呢啲咁深嘅嘢，我地唔喺呢度討論嘞(因為我唔識咁多)。八卦符號通常膽拖太極圖，代表儒家同道家嘅終極真理──「道」。

咁究竟「八卦」一詞係點樣演變成現代俗語之中，流言、謠言、緋聞等等小道消息嘅意思呢？原來喺N年前，香港某小道消息雜誌為咗提升銷售，學人地英國嗰啲成人雜誌咁，喺刊物中加入裸女圖片，但又驚當時啲人保守未必接受得到，就好creative咁以八卦圖代替打格仔來遮掩圖中嘅重要部位嘞。從此以後，八卦雜誌就成為嗰啲小道消息雜誌嘅代稱，而「八卦」一詞亦都喺師奶界之中添加咗新嘅含意。呢單堅料嚟架，唔係亂噏架。(http://zh.wikipedia.org/w/index.php?title=%E5%85%AB%E5%8D%A6&variant=zh-tw)

不過令人疑惑的是，何解佢地會諗到用八卦圖，而唔係太極圖、或者星星、月亮、太陽呢？唔通雜誌編輯係道家術士或者風水佬？又抑或同八卦中間塊「照妖鏡」有咩啦lung呢？會唔會係有闢邪作用呢？好，趁廣告時間，再諗吓呢個問題先......

廣告時間：
一部的士突然在路中心失控，並發出緊急煞車聲。鬍鬚佬司機轉身，一臉歉疚，語帶無奈地縮縮膊，對後坐乘客說：「對唔住呀，香港腳發作......」 女乘客尖叫後驚魂稍定，連忘整理亂髮。男乘客極為燥底地叫嚷：「哼! 用愛膚堅啦!!」 (然後唔知點解女乘客偷笑，但又冇NG到出咗街)
旁白：「愛膚堅皮膚噴射劑，對付香港腳確有功效。」


一幪面忍者身手靈敏，一個空翻就跳進露台。
「喺月黑風高殺蟲夜，黑旋風忍者為民除害。」
忍者神氣地(雖然睇唔到樣，但係feel到佢好神氣，呢位"茄哩啡"認真好演技)攞住支黑旋風喺度噴
「唔使用劍嘅，用黑旋風就得啦！」
「黑旋風夠晒威，黑旋風的確好使! 今年係黑旋風嘅世界! 」

唔知點解，愛膚堅硬係膽拖黑旋風喺深夜時份連環播出架呢？Anyway今日時間差唔多嘞，暫時講住咁多先。當然唔好忘記我地嘅問答遊戲啦。今集嘅問題係：點解大部分嘅佛教徒都喺北半球嘅呢？歡迎家庭觀眾喺留言板填寫你地嘅答案，下次節目時間再見啦，拜拜~~