Wednesday, May 16, 2007

咬文嚼字(五)

自從本大俠正式進升為師奶級後,都有好一段日子冇主持「咬文嚼字」呢個節目嘞。

大家有冇諗過,點解結咗婚女士會叫做「師奶」架呢?根據「俗語趣談」,賜官將此詞解釋為少奶的音轉 。但一講到「師奶」,相信大家都會不其然咁出咗:「一個電晒髮、水桶身型、一身深圳A貨look之中年婦人,攞住幾抽餸喺街市同菜檔老板講價」呢個picture。咁「師奶」一詞是褒是貶,則見仁見智。不過 , 據說幾十年前有個所謂貴婦咁物體,被一名小販稱為「師奶」後嬲到出晒煙、五官移晒位,甚至告上法庭,認為「師奶」呢個稱呼有辱佢尊貴身分咁話喎。 依在下愚見,其小題大做之舉才是真正有失身份。不過,由此可見,「師奶」呢兩個字威力實在非同小可,而師奶呢類物體,大家亦絕對不容忽視。

既然「師奶」源於「少奶」一詞,咁大家以後都可以稱本大俠為少奶,仲要係大嗰隻添,即係eb大少奶,你話架勢唔架勢呢!


盧David: 嘩! 大隻碗,大隻碟,搏命猛擦!
吳孟達: 印印腳! 洗靚碗碟有好方法!
盧海鵬: AXE洗潔精潔力夠強!
合唱: 餸菜漬有AXE 即刻清哂! AXE泡沫多香噴噴呢! 咁靚優質產品認真good呢! 斧頭牌good哂!
(大家仲記唔記得廣告中巨型碗碟呢?你可以click入YouTube度重溫呢個咁經典AXE 洗潔精廣告架,包補你睇完嗌encore!)

想當年盧David、吳孟達、盧海鵬風靡萬千師奶,大家屋企肯定都曾經擁有過AXE。好嘞,跟住落嚟當然唔少得我地IQ題環節啦。今集問題係同所有師奶息息相關:一間百貨公司正進行一折大減價,一貪小便宜之師奶以9秒9極速衝咗入去,買完好多嘢之後就瓜咗。究竟佢係點死架呢?識答師奶或non-師奶請於本blog留言啦,不過答中冇獎,多謝各位。(答案將於本星期內揭曉)

1 comment:

eb大俠 said...

好可惜今集嘅問題冇人答中......唔,應該話冇人答至啱。唔知係因為問題太深抑或節目收視率低。Anyway,問題答案係:一折大減價咁抵,個師奶唔洗問梗係"抵死"架啦!個答案係咪好抵死呢?多謝各位!