印度餐恐懼症

未知道閣下有否到過天竺，在下則很幸運曾在當地參加過好幾次武林盛會，最近一次是上個月師傅的85歲壽辰。天竺那裡人潔地靈，的確是取西經的好地方。不過談到食物方面，在下個胃當堂有點反反地。大概是在下的思想制約，但一日三餐都面對著那些以印度香料煮得溶溶爛爛的糊狀物體，不論是肉是素，都是一壇黃黃綠綠、結噠噠、似咖哩非咖哩、味道差不多的東西，實在有點怕怕。

曾經一次在天竺參加完武林盛會順帶旅行，在當地逗留了一段短時間後終於投降，要四處找西餐吃，幸好有麥當勞救命。不過入到麥當勞都要識叫嘢食至得，否則像某位師主咁，點了個甚麼chicken burger(只係當地麥當勞至有架咋，一聽落去都知有"境轟"，好明顯該師主閒時無食麥記的習慣)，一咬落去啖啖都係嗰隻印度香料味，真係大吉利事! 以往在下得閒無事都會與友人一起吃吃印度菜，但自從那次旅行之後，在下只有在天竺或沒有選擇的情況下才會食印度菜。話雖如此，可能是在下後知後覺、反應遲鈍，上個月在天竺時居然超開胃(唔記得咗自己的印度餐恐懼症)，家母病病地見在下食完一碟又一蝶，都忍不住反反地眼(兼反反地肚)，到在下坐飛機回港時才突然開始有點飽飽滯，諗起印度餐又突然有點驚，好邪!

唔講你唔知，其實家母亦曾令在下對好幾樣食物患上恐懼症，包括芝士焗菠菜薯蓉、牛角飽......等等。其味道是無問題的(仲好好食添)，不過佢係咁整係咁整，在下又係咁食係咁食，終於食到驚咗，以後都唔想再食(可能食盡了今世的quota，有可能嗎？)。不過在此世上，有一樣東西在下百吃不厭(到目前為止)，就是火腿三明治。曾幾何時在下一日"隊"四份(成磅麵包)，"隊"足兩年，肥足10磅，都咪話唔驚! 假若在下練唔成輕功水上飄，都真係唯佢是問呀!

想知道更多有關上個月師傅壽辰的盛況請按此